Saiha Herald Daily Newspaper Editorial Board ta pachhuahpano pa ‘Maraland Herald Magazine ‘cha Mara Students’ Organisation(MSO) 23rd general Conference, 25th Sept.2008 liata Guest of Honour Puhpa V.ZACHO, Education Officer,MADC ta zawpi zy reithei aw pata a Release haw. Daihti a cha-ie kawna chota MSO Gen.Hqrs. chhituhpa zy ta he hawpa daihti pha kawpa maniah ama pie pa vata, Maraland Herald magazine Board-zy ta eima ly hmeisei.
Internet tawhta Article pha kawpa maniah a kaw thyupa, Dr. Lai-U Fachhai, Puhpa P.T Hlychho nata Puhpa Derick Salai Solo zy cho liata alynabie eima hla chanei. Khichho tawhta Article mania thyupazy cho lia chhao eima ly ngasa. He Magazine pachhuahpanona chhapa nata a chhuah pa cha, eima rah siku hawtizy chata eima taotheina a y chhopa a cha tahpa ta pacha pata taopa chata, Internet tawhta chysa thokhazy pachana liata, keimo athohna pachana a hneipa zy chhao y ngyu aw ei ta, chahrasala, eima Magazine he nohkha chho zuapa chata Bu 20 ngahla zuapa a cha. A Cover he Color ta taopa cha taraw ta, chahrasala eima rah hneina ta apha mahleipa vata, Black&White ta ECM,Offset liata taopa a cha. Eima rah thapasana chota maniah a deichhy tuhpa nata maniah a khokhei tupazy choliata eima lyna thata a cha,anodeikua Mara sawzy he Literature pasahsa awpa reithai kaw sai hra ei si la, eima taochiepa, eima rah liata nopaw hmeiseihpa zy ta Article ama roh pa chhao chaleina chah pahno mah mapi. Daily News Marareih ‘Khaihna’ tahpa pua haw ta, Subscriber hlu hlei hra vei ei. Chavata, thyutliapa zy eima rah liata raihria awpa he a hlu kaw pa ta a la.
