( Herald News ) : Zahnia zala daw3.00pm liana khata, MTP hqrs nata MJA Siaha zy ta MTP Hqrs Oficce liata Joint Meeting hneipa cha ta, atahma hla eima rah zawpi ta, niebaw apatoh patiana Gas chochah liata rairuna eima tyhpa nata Siaha Bank la ta rairuna eima tyhpa kao nano nanopa zy siezie alaichadai laih nawpa dah hmala awpa chochah reipahmaona hneipa cha ta,
Meeting he Puhpa T.Chatlua President MTP (H) Siaha chhithana ry liata Joint Meeting he hneipa cha hei ta, biethluna ama vawhnei ha chiepa tawhta alaichadai pazina hneipa cha ta, Siaha liata Gas la chhah ta, hmo siano leipa a y tahpa pahnopa liana heta biehnei tuhpazy hnota tlokheipa ta ama hmotaopa liata adongaitapa nata khokhei viapa chyhsa pie lei awpa nata riethei viapa zy pathlua laih ngakaw awpa yleipa ta, achana dokawpa liata adualaih ta riapha kawpa ta eima rah liata eima niebaw tichho beichhona hmah ngahaipa cha, a raohah kawpa ta, raiparuah awpa ta, nata eima rah chata ama hmopha taona kyh liata ahawna tao awpa zy nata hria paraoh khei awpa ama khona biezy tlokhei awpa ta reipahmaohna ama hnei tahpa ta eima biedaona ta reih ta,
Siaha khihpi chho liana heta Bank hneituhpazy hnota Zawpi ta Bank ama daona chochah liata rairuna ama tyh holo ngakawpa rairuna chha chaipa nata Loan alatuhpa chyhsazy ta ama daona chochah liata rairuna ama tyh theingathla hapa zy nata Loan ama piena dah chochah siezie a chu pasia laih lyma ta, biehnei tuhpazy hnota tlokheipa cha sa la, he hleikho ta Siaha District chho liana heta,thotlah khih la ta Electrict Current pakhaisa n’awpa dah liata RGGVY hmapa ta hmala ngahaipa chochah asiezie chhao alaichadai ta a chu pasia awpa pacha pahmaohna ama hnei paheih hra.
He meeting liana heta MTP Hqrs nopawpa zy nata MJA member zy ta, eima rah chata ama raihria nawpa dah hmalana ama hneina liana heta , akipha ngasaha ei ta, he chochah liana heta, reipahmaohna hneihei awpa ta apahnosana ama hnei pahra.
