( Herald News ) : Tari 03/08/2012 my 10:30 AM pa liana kha ta Mara Autonomous District Council Monsoon Session 2012 nohthoh chho hneipa cha ta, Puhpa Hiphei, Chairman, MADC chhithana ry liata MADC Session Hall liata pathaopa cha ta, Monsoon Session he Pachyhnoh nata pahanoh zy liata hnei pazao leipa ta, Zahnia tlia Hriatua noh nataZahnia Hriahei noh my 10:30AM pa tawhta Session hneipazaopa cha ta, Zala daw 1.30pm la liata pachhasa pahpa a cha.
Session daihti ama hmana hmiatua chaipa liata Chairman ta Biehrai reipapuana ahnei khai tawhta Penal Of Chairman cha ta Puhpa LC.Chakhai nata Puhpa J.Rawna zy rao ta, hiahrina nata achhyna daihti thlai ta pazaopahpa a châ.
Atako Session liana heta hiahrina Starred Question 50 taoapa acha no ta, house liata pacha pahmaoh awpa ta 30 apykheipa cha ta liata Unstarred Question 5 angia ta, Unstrred Question sapangawh(5) achhyna hneipahpa cha ta, Hiahrina liata alaluah viapa zy dua hry liata MADC Education Department ry liata Pachutuhpa Posting & Transfer ahluh ngasapa chochah hiahrina nata MADC Town Committee zy, CEM nata Chairman Quarter taopathina chochah hiahrina biezy reirana hluh viapa nata MADC Office staff zydua hnota hlao adaih leina chhapa nata athma ta 50% arrear pay pie awpa nata pielei awpa reihpa siatheipa a cha ma..? tahpazy cha alaluah viapa zy cha ta, achhyna starred Question 30 liata sathoh (3) ngalah he achhyna tao hmaleipa a cha.
MADC liata soh adaih leina hiahrina cha Puhpa RT.Zachono,CEM,MADC ta achhyna liata Central liata Budget he Vote of Account ta Passed pa cha ta, Mawrah sawkha lia chhao Vote of Account pyly ta Passed pa a cha pah hra, atlia ta liata Session liana khata Budget pitlohpa passed pa a vaw cha heih hra tahpa ta chhopa siana hnei ta, He hawhta hmo yzie a chapa vata RE chhao he eima hmothei mah leipa a cha tahpa ta reih ta, atanoh ta MADC Session hnei haipa cha Siaha Local TV sâ 2, NSV nata HSV ta zawpi zy mothei awpa ta Live ta pie papua ta, he he râh ryureina zawpi lâ ta palâhâna kyh liata hmasiena a châ hleikhô ta, ahy rai ta sawkhana cha vaw taohra ei sih la, zawpi ta sawkhâ liata ngâna ama pahniena kyh liata hmo peimawh chaipa miakha a châ hleikho ta, eima hmotao phapa nata padoleipa zy cha zawpi ta pahno thei hra bah eisa la tahpa House liata a reih pah heihra.
Monsoon Session Hiahriana liata angiapa zy hlukaw ta,, Puhpa K.Chiama. MDF-MNF. Hiahrina-7 Puhpa FC.Rehmo MDF-MNF hiahrina-5. Puhpa B.Pasia,MDC-MDF hiahrina -5. Phuhpa Tiahlei syuhlo MDC-IND hiahrina-3. Puhpa Pakhu Hlychho,MDC-MNF, hiahrina- 2,Puhpa Nahlo Solo,MDC-MNF hiahrina- 3. nata Puhpa J.Rawna,MDC-MDF hiahrina. 3. Puhpa C.Lawbei MDF-MNF hiahrina-4 zy he hriahrina alaluah viapa angiapa zy a châ, he session liana heta member zy ama tao awpa nata reih awpazy patlo tawhta Daihiti raopa yleipa ta, Chairman ta session cha apala kawpa ta apachhasa.
Eima District Council Monsoon Session hnei ngahaipa cha , O la tawta Local TV tawhta Live tah avaw mohpazy chata, ama bie reihpa rai theithai awpa nata pahno theiparaih cha veih tahpa ta Chairman bie reihpa ngalah a theityhpa cha ta, asiapa ta thei thaipa a cha leipa vata, Sound system thlai ta taopathina raihria parah theipa cha theisa la tahpa zawpi kho dah liata biedaona ta reih.
MADC Session liana heta nathlietuhpa zawpi zy hlungasa ei ta, Media la tawhta chhao ama cover pahnie kaw hra.
