Laipuitlang, Aizawl o chopa liata ri tluachhi a châ

Aizawl May 11, 2013: Atamy la liana khata Laipuitlang vaih, Aizawl liata PWD Quarter o chopa vâta o 11 chothlu ta, chyhsa ri 6 hmô chypa châ ei ta, he News pachhuahpanoh na daihti lia he chyhsa thatih pahno leipa 12 ama y. Ri hropa chhao hmôchhi viapa a châ nata pangiasapa a châ.

He hawta chhiena rârôh y ngâsapa a tlôna chhâpa he, atamy myrâh 3:00am râhchhôpa liana khata Laipuitlang, PWD Mechanical Division Building kiah lâpi mâthi liata PWD Quarter Building lai kawpa cha a Foundation chhao ta alei chopa ta lâ ta, a mâthi la ta o 11 zy cha a chothlu(vi/siekhei) khai ha. Laipuitlang YMA chhithatuhpa Puhpa Lalrinawma tawhta biedaona ta a reihpa cha, he building he zakô la tawhta duahmo chi achhi hawpa châ ta, chavâta atahma cha ahy hma ta he o he ama tlô khao leipa ei ta, vaihchho zawpi chata chi achhipa a châpa vâta Department biehneituhpa zy la chhao phie awpa ta bie ama tlôkhei haw hra tahpa thatih a reih.
Myrâh dawh 3 râhchhopa liana khata o he acho thei awpa duasu a châ tahpa pahnopa a châpa vâta, thokha cha arâ hmâ ei ta, he athipa zy he apahno hmâleipazy ama châ. O araopa zy he; PWD Quarter(ama tlô khao leipa), Pihnô Sangpuii O Assam Type, Pihnô Biakmawii O Assam Type, Puhpa Issac Singson-a O Concrete chhah-5, Puhpa Lalkima O Assam Type, Puhpa Lalrinawma Varte O Concrete chhah-4, Puhpa Zairema O tlôpa Assam Type chhah-3, Puhpa J.Lalmawia O Concerete chhah-3, Presbyterian Awnanopa Jubilee Hall chhah-4( Ama Chowkidar chhôkha tlô haipa) hleikhô ta Ramhlun Venglai ôna chho liata Assam Type o sano zy a châ.
He chhiena liata chyhsa athipa ama moh pahno theipa zy cha; 1. H.Lalthasanga (31) Ramhlun venglai, 2. Lalduhsaki ( Laipuitlang), 3. V. Lalmuanpuii Thingfal, 4. Hmingthanpuia ( Rabung), 5. Lalrelfela Sailo(22) nata 6. H.Lalnunmawia (42) zy ama châ. Chyhsa pano ri he thao ngâ haipa a châ.Hmâphaohpa chyhsa 9 zy cha Aizawl Civil Hospital mohôh haipa ama cha hra tahpa eima biedaona ta apalasa.

Atamy la liana kha pachhana rai hria pathao lymâpa châ taraw ta, Current(power suplly) y leipa vâta, khodâh hawta raihria hmasie thei vei tahpa bie daopa a châ. Pachhana rai Disaster Response Force nata Police zy chhithana ry liata hria lymâpa châ ta, zawpi hlupi ta pachhana rai hria awpa ta ama puapakhy tahpa biedaopa ta a reih hra.
Atahma Thatih pachhuahpanoh hai no he, chyhsa 6 ri hmô hawpa châ ta, chyhsa pano hropazy cha myrâh via la kha cha ama mobile liata phone theipa châ taraw ei ta, my 10:00am la kha cha phone thei khao hra leipa ama châ. He panopa zy he, Concrete o achopa chho liata ama y nata pangiasapa ama châ. Atahma he chyhsa 12 zy ama mobile phone liata contact ei ta , phone thei leipa ei ta, ama thatih pahno mah leipa zy ama châ hai.
He chhiena atyhna su la he Chief Minister Puhpa Lal Thanhawla, Home Minister Puhpa R.Lalzirliana, Transport Minister Puhpa PC Zoram Sangliana, Parliamentary Secretary to Chief Minister Puhpa Lal Thanzara zy hleikhô ta Officail chyhsa peimawhpa zy ta thatih ama thei pataw nata ama tly hra.
Source : Dingdi FB Group.( Thatih he vaw update eima chhuah lyma aw. Thlachha bao chyu ei suh vy.)

Update(2:30pm): Laipuitlang o chopa liata chyhsa athipa ri 10 lapapuapa châ ha ta, atahma he ri tlua pazao nga haipa a châ. Chyhsa 8 he ama thatih pahno theipa châ mah vei. Vaduana atyhpa hry liata vadua pachaipa chhokha cha Puhpa Vanlalhmuaka, Laipuitlang chhokha châ ei ta, Puhpa Vanlalhmuaka lapino Pihno Lalduhsiki, Melody Lalhriatchhungi (13) nata Pihno Lalduhsaki nawta Ls.Lalhriatzuali (Teteii)zy ama hlao.

 

“MARA LITERATURE A BOHNA CHA THYUTLIA ZY MAOPHAOHNA A CHA”. By: JB. KHAISIA New Colony- III

( Herald News/Article ) : ‘Mara Literature’ a boh thei nawpa ta, Mara Missionary hmiatua chaipa, Rev R.A. Lorrain ta Ko 1907 tawhta hmah vaw la pathao ha ta, cha a hmala chiepa pamih pathawh via awpa ta, MADC liata nopawpa zy nata ECM nopawpa zy ta K 1987 liata Mara Literature Board tahpa yzie hnei viapa ta vaw siekhei ei ta, Puhpa A. Zakia, Head Teacher Gov’t Primary School Siaha Vaihpi (Retired), National Awardee ta, ryutlohpa Mara Reih Grammar pha ngasapa taih miah avaw taopah hapa a cha. Marapa sawzy pita, eima Missionary novah nawh nata MADC nopawpa sahlaozy nata ECM nopawpa zy lata alyna bie reih awpa a thata eima bahpa ta ei pahno.

Chadei cha leipa ta, Ko 2001 liana khata, Puhpa Dr. S. Hrachu, Head Teacher Gov’t Primary School, Chhaolo (Retired) ‘The Father of Mara Literature’, ta ngatlah a chapa hma lahpa ta, ‘Mara Literature Committee’ tahpa ta, tahma nota MADC liata Education Executive a patupa Puhpa N. Zakhai, New Colony-O liata paduapa cha ta, Puhpa N. Zakhai he Patron member a cha tua chaipa ta a vaw cha. Marapa sawzy hry ta cha, Puhpa A. Zakia, Siaha Vaihpi (The Builder of Mara Literature ta nga tlah chapa) nata Puhpa Dr. S. Hrachu zy he Mara Reih pabohsana rai a hria chaituhpazy ama cha tah thei awpazy cha ama cha.

Tahma liata ei reikhoh chaipa cha, eima Missionary hmiatua penawh zy nata, MADC nata ECM nopaw penawhzy ta, Mara Literature a boh thei nawpa nata hmasie lyma thei nawpa ta a thaby ama pathaopa dei cha leipa ta, akhophie taih miah ama vawchhih (tlokhei) hapa cha ta, a chhana (hlaotlohna rah) tlo awpa deikua cha, thyutliapazy liata a pahniehpa ta a cha. Chhituhpa Mawsi cha avaw macha kawba vata Izarel sawzy cha Kana rah tlo thei (a ngiathei) khao leipa ta, a raihria chabahpa pazao awpa ta thyutliapa Zawsua hnohta maophaona piepa a chapa hawhta, tanoh daihti lia chhao he Mara Literature a bohna nata hmasiena cha thyutliapazy maophaona a cha tahpa eima pahno awpa he ei khoh chaipa a cha.

Keimo Mara Thyutlia sahlaozy pita a y chakhyh theipa cha khao mapi. Chhituhpa hmiatuapa sahlaoDr.S. Hrachu zy, machâ A. Zakia zy nata nôpaw thokhapa zy vaw macha haba eita, chavata ama raihria chaichamah (Chhahchabah) pazao awpata keimo, Marapa Thyutlia sahlaozy peimawh pita, a ei viapa ta, Thyutlia saw cha a thai sahlao chhochhi ta cha, rah kaw via pazy duasy nata reikah hropazy a chu hluh ta, eima rih ( Mara Literature) a boh nawpa nata laiseih via lyma nawpa he, eima paloruhpa liata lai chai ba sala tahpa ei khoh chaipa a vaw cha.

Mara thyutlia zy, Mara literature a boh nawpa pachana liata ahra ba suh vy. Chihro, phohro reih ta, disaopa (assimilate) eima cha pathlei aw tahpa he chi a chhih kaw he zaw’ pachatua u, eima rah (Mararah) nata eima khihpi (Siaha) zy he chihro, phohropazy ta, nohta, thlatoh, kotota, mia baichhi ngapazy he, noh via liata cha, eima reih a padahsa tuhpa lata avaw cha theipa chata, tahma chhaohe, eima khihpi Siaha liata English medium School avaw hlu pahe, apha kaw nota eima saw nawzy ta, Mara reih rohzie nata reihzie dohpa apahnopa ama soh kaw bapata a la.

Chavata, thua cha mei-iapa liata rao eita, asaih (Asah) ngano ta syulo ta phy naota, avaw chakua tawta phy ary pa hawta, reih (Leterature) chhaohe daihti ryhpa liata, avaw boh thei nawpa nata laihseih nawpa ta hriacha thlie thei awpahe a peimawh kawpa a cha. Chavata Mara leilo saw (Soil of Sons) zy pita, naino so leipata, eima su chyu liata eima reih a boh na nata laihseihna eima pacha peimawh awpahe a byuh kawpata eipahno. Duhsaw (Lohcha khaihmah) tahpa ta eima chhohhmo phaichai khiatala, eima reih he  disao awta, Mara rah he, “DISAOPA RAH”, lata acha tlamaw leipa acha tahpa he kha pahno thlah ha suh vy.

 

MTP(H) NATA SIAHA TOWN BRANCH CHHITHATUHPA ZY MEETING BIE PATHLUNA

Siaha Herald(22/11/2012): Atahma hla liata ADC ry liata NGOs zydua ta eima buakheipa CYMA ta ama kophuah alaichadaina cha ta, ama biepathlupa ADC zy biehneina laiviapa hmo n’awpa liata pakha achhuana vata zahnia Dt. 21/11/2012 pa 3:00PM liata MTP(H) Chhithatuhpa zy nata Siaha Town Branch liata President nata General Secretry zydua cha Meeting peimawh ngasapa hneipa cha ta, pachana varo reipahmaona hnei khai tawhta he a ry liata palasapa hawna he ta, biepathluna taopa a cha.

1. MTP(H) moh ta Press Release he tao cheingei hra awpa ta pathlupa a cha. Dt. 22/11/2012 nohchho hlata zawpi reithei awpa ta pachhuahpanoh pa a cha aw.

2. CYMA hmalana he MTP ta athaona tawhta a chhana taih ta a laichadai aw ta, abyuhna nata ngiahna hawta Group-7 YMA, Siaha awpa ta, All Political Party nata NGOs zy chhao asaohiahpa a cha aw.

Note : MTP(H) ta PR a chatliepa ta a papua leipa vata, Town Branches la tawh chhao ta, maochhiena hnei ei ta, chahrasala MTP(H) he achalih thlah leipa ta Doordarshan nata LPS Cable hmapa ta Dt. 16/11/2012 za liana kha CYMA hmalana ama kholei zie a paphuahsa hawpa a cha. Zahnia(21/11/2012) ta CYMA Thuchhuah (PR) achhyna deikua, MTP(H), CYLA & CYCA zy chhao ta achhy hei awpa ta so chypa a cha.

 

 

” Kheita ei nâchhy aw tly.! By.Saidi Khithie

Laihsa. Saidi Khithie   ta ” Kheita ei nâchhy aw tly.! ” tahpa  Kypachana lyubie Hlana hla a sapa music video a cha. He hla he L.Beimokhai ta aphipa cha ta, Raino Recording Studio, Siaha liata record pa a cha.

vaw nathlie tua hrama y.

 

A hyma Hrasie aw?

( Herald News/ Music ) : R.E.O’ Saikao ta, Music Video ama taopa NSV studio liata  MHP (H) Siaha ta album Release pa Music Video taothie chaipa  Hla, St. Lb.Thatlo ta, “A hyma Hrasie aw”?  tahpa hla aphipa music video a cha. Rs. 200/- ta chalei theipa a cha haw.

He hla he R.E.O. nazy ta ama sapa a cha.

 

MTP Hqrs KÔPHUAH PAHYNA – SEMINAR CHA APALAH KAWPA ta PAHYNA HNEIHA PA A CHA

( Herald News ) : Dt.17/08/2012 ,10:30AM pa khata MTP General Conference Ruyreina Resolution pathlupa MTP Kôphuah pahyna -Seminar cha MTP(H), Siaha pachhuapanohna ry liata ahmana liata daihti he Puhpa T.Chatlua,President. MTP(H) Chhithana ry liata ahmapa cha ta,

daihti pathaona thlachhana Rev. JR.Sanga ta ahnei khai tawhta daihti siezie hawhta ahmapa cha ta, Kichhai laipa Puhpa RT.Zachono, CEM,MADC ta Kôphuah pahyna  hneita. MTP(H) Term thiehpa 2012-2014 liata hmalana siekheina thatih tlapihpa phuazahna cha Puhpa R. Israel Chozah, Gen. Secy. MTP(H) tawhta nathliena hneipahpa  cha paheih hra.

Khichhai laipa cha Kôphuah pahyna nata biereina hneina liata bie reih tlapihpa zy che he hawhna heta reih. MTP Kôphuah “ Chi nata Reih pabosana ” cha pahy ta. MTP(H) zy ta Kôphuah a laichadaina liata ama hma awpa phusa Rs.10000/- baona President hnota hlana a hneita.
Khichhai laipa ta Marapa he Khazohpa ta chi nata phô eihrahpa ta he khizaw liata maniah a tlyh pa cha pita, eima Missionary zy ta maniah ama vaw tly hlavia kha cha Khizaw rah hrola ta a ypa chyhsazy ta pahnophapa châ leipa ta y pita. Khazohpa bie tawhta eima Mara rah he maniah a piepa a châ. Khazohpa ta Chi nata pho ta maniah padua ta chavata, eima kawsie laih lyma n’awpa liata eima chi nata pho, reih he eima pabosa awpa he hmo peimawh ngasapa a cha tahpa reih ta,  Marapa cha marapa na ei cha atah tlohra mara reih acheih thaileipa nata ama moh chhao reih hropa ta ama bi theithlaha chhota cha,a marapa tahpa ta cha thaileipa vata, eima diathla awpa rai cha veih tahpa reih,

areih lailyma na liata   MTP ta he Kôphuah  ahneipa he marsawzy eima  thao dyupa a chazie a reih. Marapa ta eima saw nata samohpa zy moh eima bi lyma n’awpa liata Marapa moh, bible moh a cha pachhao Mara reih ta eima bi lyma awpa a cha tahpa pahruana atao pahra.
MTP Kôphuah Seminar Paper Present pha ngasapa zy nathliena nata reih palahana ama hneina liata  Chhaih khana nata Chhaih nona ta ahmapa cha ta, Macha Dr. S.Hrachu, Rev. NC.Vabeilua, Rev. C.Thalai nata Macha K.H Beithie zy tawhta nathleipa cha ta, zawpi ahlaopa zy ta eima thokhei ngasa. He daihti liana heta, zawpi palysa awpa ta Hlasa thaipa, Puhpa A.Chhualai, Puhpa John Beizachhi Phuto, Ls. Siamkung, Ls. J.Ruby nata Ls. Eden T. Azyu zy ta zawpi ama palysa phangasa.
He daihti liana heta MTP Co-founder la tawhta Rev. T.Laikai, MTP Ex-President la tawhta Pp. N.Beikhai zy chhao ta biereina daihti ama hnei hra.

AMA BIE KOPHUAHPA APACHUNA REIHPA ZY :
1. Mara chi nata Pho he azipa eima cha . Macha.Dr. S.Hrachu

2. Mara chi nata reih pabohsana nata laiseina liata NGO’s nata Awnanopa maophaohna. Rev.NC. Vabeilua

3  Mara chi nata Reih pabosata ,palaiseihsa  awpa he Marapasaw zy maophaona a cha.Macha K.H Beithie.
4. Akhopa biepi hmapa ta :- Châna(tovyuh) hnei no ngalâh ta thapawh kaw ta.Châna hneikhao veih nahta khihtlâh nata Awnanopa lia chhao ta a pahlao hoh khaoleipa zy he chhithatuhpa phapa ama cha thei aw ma? Rev.C.Thalai zyta ama hnei.

He  daihti Khawna chata Zawpi ta  Beipa Thlachhana zydua ta thlachana  araohpa ta zala daw la liana khata daihti khawpa a cha.Marasaw khizaw rah to liata apahrpa zy ta keimo mara reih he alaiseih via lyma thei nawpa ta thapatlo rairie chyu awpa he eima Beipa khazohpa khopa a cha tahpa athiepa ta apahnosa pita, eima haw hmeiseih tahpa  ta he daihti he apala kawpa ta ahmapa a cha.

 

ECM KNP (H) Siaha ta Dorcas MAGAZINE THLAZAWHNA HNEI

( Herald News ) : Zahnia 2.00pm liana khata ECM Office Lorrain Hall liata Rev.VL.Ngaia Hlychho Secretary (Edn) tah KNP Magazine Dorcas Magazine Tlazawhna hneita, he liata Pihno Lyn Ngohei Secretary i/c KNP Chhithana liata ahmapa cha ta, Pihno F.Ngopaw tah Devotion hmana ahnei khai tawhta , Macha Pachi Hlychho Adviser tah preview na a hnei. He cha bu phuazahna ama hneina liata Mara chanozy ta Chabu ku cha rohpa (Writing) ama reih hoh thai tyh leipa vata, nata ama tiama cha reih ama paha pahlo thai tyh leipa vata, Tlaikao no nawhzy heta vahpa mohona dah liata ama thai via tahpa palaha pah ei ta, Mara no na zy ku liata apahniena apathu ziezy palahana hneipah hra ei ta, Chano cha rohpa he areih tuhpa chyhsa pathipaloh liana heta maniah pahnie via ta hmotaothei ziezy nata reih no-ai chhih leipa a chazie chhao ama palaha pah hra,

KNP ta Cha bu Dorcas Magazine tlazawhna eima hneitheipa vata alypa cha hmeiseih. Marasaw zy hmia la toh via lyma suh vy.

 

COUNCIL Vaih MTP Branch ta, AMA Vaih CHHOH LIATA SAHMA HLUPI APATU.

( Herald News ) : Atakȏ MJA nata MTP Gen.Hqrs ,Siaha zy ta, Eima rȃh chȃta raihria paraonah hmochhiepa paritheipa thyutliapazy chamaih chichhihpa hrichhiepa ta atlathlu ngahaipa Sahma nata paritheipa nano nanopa zy adyuna hriȃpazaona ama hnei laihna liata adongȃsȃpa ta  Hmopha  taona kyh liata riapha ngȃsȃpa ta ahriaparaona phapa thatlȏ kawpa ta hneipazi lymȃ-pa chȃ ta,

Atahma hla he Siaha khichhoh liana heta, MTP Gen.(H) biepathlupa alaichadai pazi pa ta, vaih chho liata hmochhiepa sahma nata paritheipa azuahpazy vaih khotho la tawhta avaw ngiakheipa nata ataopa, vaih chho liata MTP Br, nopawpa zy nata MTP(H) ta apasa theichaina hawhta hriena piepa a cha awpa vata, azuahpa nata taolei awpa ta pakhana bie papuapa a cha ngahaipa no ta, Council vaih MTP branch Siaha zy tiama na zawhzi ta, hmochhie Parithei-pa Sahma hlupi patu ei ta, ama patupa zy cha,

Atanoh  tȃri 8 Thlazoh 2012 my daw 7.00Am liana khata MTP(H) nȏpaw zy nata Council MTP Branch, MJA, VC.YMA,YLA zy ta ama patupa pahleipahlȏpa ta loraoh kawpa ta parao khȃipa chȃ ta. Council Vaih   Site drain liata leih khai/thypa ta pahleipahlo khaipa a cha, Phusȃ lȃ ta Rs.1.5 Lakh mȃh rachhȏh a chȃ.

Mara Thyutlia Py, Gen (H) Siaha, Mizoram Journalist Association (MJA) Siaha, nata MTP Br  vaih anano nanopa zy  hriaparaohna zy hmala zawzi ta, paritheipa Sahma nata Thohna ama patuhpa zydua biedaona liata a reihna dȃh ta hmochhiepa paritheipa he phusa la ta reihpa ta 15Lakhs kho la mah a cha tahpa ta biedaona ta a reih. alypa a cha hmeiseih.

 

NEW SIAHA MTP BRANCH ADUAH PATHI Haw

( Heralad news ) : Tari 4.8.2012 zah liana khata MTP Gen.Hqrs.Siaha chhithatuh nopaw zy chhithana ry liata N.Siaha MTP Branch Gen.Election pahneisapa a cha haw,

2012-2013 term chata N.Siaha MTP Branch chhithatuh thiepa nopaw zy atlyna pahneisapa cha ta,  N.Siaha he zako la liana khata rairuna nata buana  eima tyhpa vata Branch suspend pa cha ta, atahma he athiepa ta padua pathina hnei pakua theipa  cha hata, Alypa a cha hmeiseih. Chhithatuh thiepa atlyhna liata atlohpazy cha

Hezy he ama cha;-

1. S.Lalramnuna                   –          President
2. S.Lalrelkima                     –           Vice President
3. Ricky C.Lalrinliana            –          General secretary
4. Roslyn .J.Mokhu               –           Treausurer
5. Isack T.Beingachha           –          Secy.i/c, Finance
6. Lalchhantluanga                –         i/c,Information
7. Jack xchawngthak             –         I/c Games&Sport
8. J.Lalremchhungi                –         i/c Art&Culture
9. C.Lalfakmawia                   –         Secy i/c Social/w

hezy he atlyhpa tlohpa zy cha chy ei ta, hmiala eima rah chata ama raihria awpazy hlukaw ta, chavata, Marasaw ado ngasapa ta nata riapha ngasapa ta ama raihria awpazy maraland chata hmia ama toh via lyma thei nawpa ta, alykawpa ta bao awpa ta adeichhy chyu suh vy